西藏發掘一處中國已知海拔最高考古遺址

繼續同史友們介紹我國嘅一啲最新考古發現，如果有去過高海拔地區嘅史友應該都知道，由於氧氣稀薄等因素，普通人要正常活動已經唔容易，更何況係發掘到考古遺址！要近日西藏就成功發掘一處中國已知海拔最高考古遺址，今次阿史就帶大家睇一睇啦！

據西藏自治區文物保護研究所公佈，喺2021年西藏就搵到一個洞穴遺址，喺聯同四川大學考古文博學院、仲巴縣文化(文物局)聯合考察之下，就發現呢個洞穴係一個自然形成地下溶洞，洞口海拔5000米。整體結構就分成上下兩個洞穴，上層就總長67米，喺深處仲有一個深達14米嘅豎洞連接下層洞穴，總長約50米。

喺呢個範圍咁廣闊嘅遺址當中，上層就有大量動物骨骼，下層就有唔少人類骨骼，總數目就有人類骨骼個體數至少100個，動物骨骼個體數500餘個，真係誇張！而喺一個咁大嘅遺址當中，就只係得20幾件各類遺物，經過相關測年資料顯示，呢個係秦漢時期嘅遺址，對於研究西藏西部早期歷史以及跨喜馬拉雅山地文化交流具有重大學術意義，真係要密切留意！